Panawag sa tanang koneksiyon (Latest Sabong News)
Author
Leo Lastimosa
Date
MARCH 23 2023
Bisan nagkapuliki pagpanagang sa mga pasangil batok niya apil nang pagpatay ni Gobernador Roel Degamo ug ubang patay sa Negros Oriental, private army, ilegal nga mga armas, pagpangilog og yuta, e-sabong ug ilegal nga katigayonan si Kongresista Arnolfo Teves nihatag og giya unsaon paggamit ang mga koneksiyon kon maapiki na:
Una, deklarar dayon nga bisan naa ka sa gawas sa nasud andam kang moatubang sa tanang kaso pero kon ikiha gyod ayaw og pauli;
Ikaduha, pahinumdoming tanang hingtungdan nga bisan unsa kalayo paryente ka sa ikaduhang labing gamhanang pamilya sa nasud, nga ig-agaw sa ig-agaw sa asawa ni Kongresista Paolo Duterte, anak ni kanhi Presidente Rodrigo Duterte ug igsuon ni Bise Presidente Sara Duterte-Carpio;
* * *
Ikatulo, pahinumdomi si House Speaker Martin Romualdez, nga na-apura nimo pagpauli ug gidudahang nagmaniobra sa imong pagkataktak sa puwesto tungod sa pag-absent sa pila ka sesyon, nga inyong mga asawang si Colleen ug si Yedda Marie paryente;
Ikaupat, pasumbingayi og buyboy si Romualdez nga nangampanya ka para niya sa unang kandidatura pagka speaker niadtong 2020 batok nilang Alan Peter Cayetano ug Lord Allan Velasco;
Ikalima, sigehi og tawag ug kon di motubag i-text si Justice Secretary Boying Remulla nga suod mong managhigala sa una ug nagkauban sa pipila ka kawsa apil nang pagpasira sa ABS-CBN;
* * *
Ikaunom, kuha dayon og abogado nga daghan sab og koneksiyon aron makahunghong sa administrasyon nga di ka diretsong bitayon;
Ikapito, pasanginli si Degamo nga duna say mga armado ug posibleng giunay sa iyang mga guwardiya ug, kon way motuo, pakiluoy nga managsama mong Degamo nga mga biktima sa maniobra sa mga nangambisyon sa negosyo ug politika;
Ikawalo, palaban ni Presidente Ferdinand Marcos Jr. nga igo ka lang giduot sa sunudsunod nga mga panghitabo sama sa pataka nga paglambigit nimo sa e-sabong, malisyusong pagbawi sa mga armas ug mga guwardiya ug hastang masaker sa Pamplona;
* * *
Ikasiyam, pahinumdoming presidente nga nagkita mo og kaduha, ang una niadtong barangay kapitan ka pa sa Malabugas, Bayawan City; ug
Ikanapu, pangaliya sa tanang anghel sa kalangitan nga way makasulti sa presidente nga sa niaging kampanya nagsige ka og diskurso sa Negros Oriental nga maayong presidentehon si Manny Pacquiao kay di kawatan.
